Um leið og ég óska ykkur, kæru útskriftarnemar, innilega til hamingju með þennan áfanga í lífi ykkar, vil ég fara nokkrum orðum um skyldur. Við berum öll skyldur í samfélaginu, gagnvart okkur sjálfum, okkar nánustu en líka gagnvart öðrum. Tillitssemi er nátengd umburðarlyndi og nágrannakærleika sem er hornsteinn kristinnar trúar en miklu fleiri trúarbragða. Þótt við búum í samkeppnisumhverfi sem skilar okkur góðum lífskjörum þá má ekki gleymast að samfélag manna felst í að gefa og þiggja. Þannig bindist þið vináttuböndum og finnið lífsförunaut og sú sambúð snýst um það að bera virðingu fyrir öðrum og uppfylla skyldur ykkar gagnvart ástvinum.

Skyldur eru hins vegar á fleiri stöðum en hjá einstaklingum. Skólar hafa skyldur gagnvart nemendum og skyldur gagnvart atvinnulífinu og almannavaldinu. Við Íslendingar eru ekki sérstaklegar fúsir að axla skyldur út fyrir okkar land en við verðum að hugsa lengra núna. Víðsýni hefur alltaf dugað manninum best í viðleitni hans til framfara. Þröngsýni er vinur fáfræðinnar, kúgunar og ófrelsis. Það verður hlutverk ykkar allra, hvort sem þið útskrifuðust hér í dag eða ekki, að axla skyldur af trúmennsku og dugnaði.

Skóli sem vill uppfylla skyldur sínar, eins og Háskólinn á Bifröst, verður að vita hverjum hann skuldar sitt starf. Við viljum mennta forystufólk, gera nemendur hamingjusama í námi og síðar á lífsleiðinni og koma þeim öllum til nokkurs þroska. Við viljum búa góða umgjörð hér í nánu sambýli nemenda, kennara og annars starfsfólks, vinna að raunhæfum verkefnum í náminu í litlum hópum sem gagnast nemendum í starfi síðar og gefa nemendum kost á námsdvöl erlendis eina önn. Þetta eru metnaðarfull verkefni sem eru skyldur okkar en þá verða stjórnmálamenn að uppfylla sínar skyldur sem er að tryggja háskólum jafna stöðu í rannsóknum.

Við í Háskólanum á Bifröst viljum auka rannsóknir, enda höfum við stofnað til nokkurra rannsóknasetra og hlutverk háskóla nútímans er að stunda fræðilegar rannsóknir sem gagnast landi og þjóð og hinu alþjóðlega fræðasamfélagi. Fjármagn hefur verið aukið til rannsókna undir góðri forystu núverandi menntamálaráðherra og brýnt er að stjórnmálamenn skilji ekki háskóla á landsbyggðinni eins og Háskólann á Bifröst eftir. Við væntum þess að þingmenn kjördæmisins og aðrir ráðamenn berjist af alefli fyrir hagsmunum Háskólans á Bifröst.

Háskólinn á Bifröst lítur á það sem keppikefli sitt að standa vörð um blómlega starfsemi í hinum dreifðu byggðum og vera mikilvægur hlekkur, ekki aðeins í Borgarfirði heldur sem hluti af háskólakeðju hringinn í kringum landið. Við höfum öll séð hvílík lyftistöng Háskólinn á Akureyri varð því sveitarfélagi þegar iðnaðarframleiðslan hrundi. Hér í héraði eru tveir háskólar, Háskólinn á Bifröst og Landbúnaðarháskóli Íslands sem er fræða- og menntastofnun í fremstu röð, ekki aðeins á íslenskan mælikvarða heldur á mælikvarða alþjóðaviðmiða.

Við, hér á Bifröst, leggjum áherslu á viðskipti, verslun og menningu og allt þar á milli en vönduð kennsla í viðskiptafræði, lögfræði, heimspeki, stjórnmálafræði og hagfræði verður áfram viðfangsefni okkar. Við munum auka gæði kennslunnar, styrkja námið, efla rannsóknir og verða enn betri en til þess þurfum við stuðning, ekki aðeins opinberra aðila heldur fyrrum nemenda eins og nýútskrifaðra nemenda og allra velunnara í tæplega 90 ára sögu skólans.

Saga skólans skuldbindur okkur. Hún er mjög merkileg og félagsmálahreyfing samvinnumanna sem hófst fyrir meira en einni öld síðan og endurspeglaðist í öflugu starfi þessa skóla um áratugaskeið var merkilegur tími í atvinnu- og menntasögu þjóðarinnar, tími sem við á Bifröst erum stolt af en hver tími á sér sínar aðstæður og hér er og verður alltaf horft til framtíðar.

Góðir áheyrendur.

Okkur langar til að gera svo margt. Við viljum kenna enn þá fleirum en húsnæðið takmarkar okkur, en við erum að byggja nýjan nemendagarð sem verður tilbúinn í vor. Hér er Samkaup að reisa stóra verslun og verið er að byggja hér allt í kring. Við eigum besta fjarnámskerfi á landinu, Námsskjáinn okkar, sem við köllum líka Menntaveitu Háskólans á Bifröst því menntaveitan er eins og hitaveitan og rafveitan, tæki til að veita mikilvægum hlutum langar leiðir, hvort sem það er rafmagn, heitt vatn eða menntun. Menntaveitan okkar er sem ljósleiðari þar sem setjum inn í annan endann alla okkar þekkingu í formi fyrirlestra sem nemendur horfa á þegar þeim sýnist, svo koma nemendur hingað nokkrar helgar á hverri önn og stundum til lengri dvalar. Ég tel að við séum að þróa besta líkanið til mennta í framtíðinni sem verður allt að því til jafns við staðarnám hér á Bifröst. Það er gaman að vinna að nýjum hlutum, til framfara nemendum okkar í skólanum í dag en ekki hvað síst fyrir nemendur okkar í skólanum á morgun.

Háskólinn á Bifröst hefur alltaf verið í farabroddi og hann ætlar sér ekki að breyta út af því. Héðan kom forystufólk sem varð landi og þjóð til gagns og sóma, héðan kemur í dag forystufólk sem mun gera hið sama og við munum halda áfram að útskrifa slíkt fólk hér.

Ég býð ykkur, kæru grunnnemar, sem voruð að útskrifast í dag velkomna í meistaranám. Skoðið vandlega það sem í boði er og vitið hvort hér sé ekki eitthvað gott sem hentar ykkur í framhaldsnámi. Við viljum ekki heldur sleppa af ykkur hendinni ágætu meistaranemar. Þið eruð ekki laus allra mála þótt þið hafið útskrifast í dag. Farið út í samfélagið og gerið okkur stolt af ykkar vinnu og hugsið til skólans ykkar, ykkar „alma mater“ þegar fram líða stundir. Skólinn hugsar til ykkar allra hvort sem þið eruð eða voruð nemendur eða tilheyrið Bifrastarsamfélaginu á einhvern hátt eins og þið gerið öll sem eruð í þessum sal.

Þakka ykkur fyrir og Guð blessi ykkur öll.